Estudantes do IES Lagoa de Antela de Xinzo de Limia, xunto con alumnado doutros catro centros galegos, foron os encargados de xulgar e escoller as obras gañadoras da terceira edición do Premio de Banda Deseñada Tinta de Lura.
Tras un curso completo de lectura e análise crítica, o xurado —formado por rapaces e rapazas dos institutos Lagoa de Antela (Xinzo), Universidade Laboral (Ourense), Rodeira (Cangas), Rosais II (Vigo) e Auga da Laxe (Gondomar)— decidiu que os galardóns recaian en:
- O corpo de cristo, de Bea Lema.
- Buena gente, de Isaac Sánchez.
Sobre a obra de Bea Lema, os estudantes valoraron a súa capacidade para tratar temas profundos como a resiliencia, o amor filial e a fraxilidade humana, destacando ademais o uso de técnicas artesanais para transmitir emocións intensas. Pola súa banda, Buena gente, de Isaac Sánchez, foi escollida pola súa habilidade para reflexionar sobre a bondade e por manter o suspense constante ata o final da historia.
Nesta edición do certame tamén destacaron como finalistas as seguintes obras:
- Carcoma, de Andrés Garrido.
- El otro mundo, de Enrique Bonet e Joaquín López Cruces.
- A miña outra vida, de Miguel Rojo.
- Rosalía oculta, de Paula Mayor.
A entrega oficial dos premios celebrarase o vindeiro mes de setembro, coincidindo co arranque do novo curso escolar. O encontro suporá unha ocasión especial para que o alumnado poida coñecer en persoa aos autores gañadores e comezar a traballar na selección das novelas gráficas que participarán na vindeira edición do certame.
