A Casa da Cultura de Xinzo de Limia xa alberga a mostra «Arte e humor. O enxeño de Antonio Mingote», unha colección que repasa a vida e obra do histórico debuxante e xornalista español.
A exposición, organizada polo Concello, ABANCA e Afundación, estará aberta ao público ata o 27 de novembro. Podes visitala de luns a venres nos seguintes horarios:
- Mañá: de 9.00 a 14.30 horas.
- Tarde: de 15.30 a 21.00 horas.
A mostra reúne unha selección de viñetas e debuxos cos que Mingote retratou a sociedade española durante décadas, facendo uso da ironía e dunha mirada crítica. O autor, que chegou a ingresar na Real Academia Española, destacou pola súa prolífica carreira en medios como ABC e La Codorniz, ademais da súa faceta como escritor e guionista.
Esta actividade forma parte do programa Corrente cultural, co que Afundación leva propostas artísticas a diferentes puntos de Galicia máis aló das súas sedes habituais.
