A Deputación de Ourense, en colaboración co Concello de Viana do Bolo e a Xunta de Galicia, presentou a novena edición do Festival Medieval de Viana do Bolo, que terá lugar o vindeiro 4 de abril ás 18:00 horas na praza da Torre Medieval da localidade. O evento ten como obxectivo principal a recuperación e posta en valor do patrimonio do romanceiro transmitido pola tradición oral no noroeste peninsular.
Esta edición homenaxeará de forma especial ao profesor Juan Antonio Pinza, recoñecendo a súa traxectoria na investigación e difusión do romanceiro tradicional na rexión. O festival busca recrear a etapa histórica do municipio, evocando o seu pasado como residencia de nobres a través dunha programación que combina música, tradición e escenificación.
O programa de actividades inclúe a recreación da chegada da Raíña Vrraca a cabalo, recibida por trompetistas, autoridades e veciños. No apartado musical, participarán artistas de renome como Miro Casabella, as cantoras tradicionais Fiuca de Trives, Digna de Vilanova e Blandina de Cotarós. Tamén actuarán Carmen Penim, a Coral Candea, a Real Banda de Gaitas, o musicólogo asturiano Daniel García de la Cuesta, e as representantes de zonas veciñas Marta Prieto e Amelia García.
A xornada, que será conducida por Montse Estévez, contará coa presenza dos Boteiros e Fulións de Viana e será emitida a través das canles de YouTube institucionais.
