O Concello de Xinzo de Limia e a Asociación Española Contra o Cancro (AECC) de Ourense habilitaron o Parque do Pombal como «Espazo Libre de Fumo». Esta iniciativa busca protexer a saúde pública, con especial incidencia nos menores, e concienciar sobre os riscos do tabaquismo en contornos públicos.
Esta medida é parte dun convenio de colaboración firmado entre ambas institucións no ano 2025. No acto de presentación participaron o alcalde de Xinzo, Amador Díaz; o tenente de alcalde, Antonio Fernández; a concelleira de Servizos Sociais, Saúde e Igualdade, Ángeles Martínez; e o presidente da AECC en Ourense, Germán Rodríguez-Saá.
Ademais desta nova sinalización, o convenio permite que a AECC ofreza servizos de apoio integral e gratuíto directamente no concello para pacientes e familias, mediante un equipo técnico especializado que ofrece:
- Atención psicolóxica: apoio emocional especializado no diagnóstico e tratamento.
- Atención social: orientación sobre recursos públicos e axudas de emerxencia.
Coa habilitación deste novo espazo, Xinzo de Limia reforza o seu compromiso coa prevención do cancro e a promoción de entornos de convivencia máis saudables.
