As profesionais do CDR O Viso, a educadora social Aine Opazo e a traballadora social Paula Blanco, participaron na Xornada Provincial do Terceiro Sector, un evento organizado pola Deputación Provincial de Ourense para fomentar a cooperación entre as entidades sociais da provincia.
O obxectivo principal desta xornada foi promover a visibilidade do Terceiro Sector e o intercambio de experiencias, buscando fortalecer o traballo en rede para mellorar a resposta ás necesidades da cidadanía. Un dos puntos fundamentais do encontro foi a necesidade de coordinación entre a Deputación e as entidades sociais en materia de estranxeiría. Esta colaboración resulta esencial para facilitar a integración social e os trámites administrativos das persoas migrantes, especialmente durante o actual proceso extraordinario de regularización.
A participación do CDR O Viso permitiu á entidade compartir coñecimientos, identificar necesidades comúns e reforzar alianzas institucionais. Con isto, a organización reafirma o seu compromiso cunha intervención social coordinada, próxima e centrada nas persoas, contribuíndo así á construción dunha provincia máis inclusiva e con igualdade de oportunidades.
