Un veciño de Chamusiños que estaba desaparecido foi atopado esta madrugada no monte, moi preto da súa casa. O home presenta diversas feridas, polo que foi trasladado ao hospital para recibir atención médica.
O operativo de busca activouse entre as 04:00 e as 05:00 horas desta madrugada. Na procura participaron os propios veciños da zona e axentes da Garda Civil. Aínda que estaba previsto usar un dron para facilitar os labores, finalmente non foi necesario ao localizalo pronto.
Tras ser atopado, unha ambulancia atendeu ao home no mesmo lugar. Aínda que as súas feridas parecen ser accidentais, os servizos sanitarios decidiron o seu traslado ao hospital para realizar unha revisión completa do seu estado de saúde.
A familia do home quixo trasladar o seu agradecemento público tanto á veciñanza como aos axentes da Garda Civil pola súa rápida e eficaz colaboración na busca.
