Con VAR, mais sen café

O Antela despediu o ano no Fernández Carrera con humor e moito frío nun partido a beneficio do Banco de Alimentos de Xinzo que enfrontou onte ao equipo xuvenil cun combinado de directivos, adestradores e nais e pais. Recolléronse 110 quilos de alimentos que o club entregou a mesma tarde no Banco.
Foi a parte seria dunha xornada na que o combinado luciu o uniforme titular, as camisolas branquinegras, que non puideron disimular barrigas flagrantes e un estado físico xeral preocupante.
Enfronte, os rapaces, de vermello, fixeron o que puideron por non mancar ningún familiar nin directivo, e xogaron camiñando para non cansar a un rival que acabou con 17 sobre o campo (máis o porteiro) ante a impasibilidade dun árbitro claramente parcial e que ignorou case sempre os continuos chamamentos do VAR (tecnoloxía que se estreou na Moreira, inda que de cartón).
Houbo unha chea de goles anulados aos xuvenís por supostos fóra de xogo, penaltis a favor do combinado branquinegro inventados todos polo colexiado, moitas chanzas desde o público antes de quedaren todos conxelados, e ausencia de bar o día que máis falta facía un café. Ninguén se mancou. O resultado final descoñécese.
O 2024 acabou cunha modesta festa, e o 2025 aparece cheo de bos propósitos, entre eles, seguir apoiando causas solidarias que merecen a nosa atención.