Arrancou en Xinzo a campaña de alegacións contra os permisos de minaría a ceo aberto. Stop Eólicos A Limia, Xurés, Celanova e o Movemento Ecoloxista da Limia sumáronse á veciñanza que se está empezando a organizar contra o proxecto Novo Frixo coa campaña de información e participación pública sobre os proxectos de minaría que afectarán á Limia e Monterrei: “Mina Novo Frixo Non”.
Así, durante o día de onte e coincidindo coa feira de Xinzo, recolléronse nunha mesa informativa preto de 200 alegacións contra Novo Frixo e distribuíronse outras tantas. O prazo para o seu rexistro remata o próximo luns, 22 de xullo, e con tal motivo a campaña nos puntos de recollida darase por rematada o día anterior, domingo 21, para poder levar a cabo o rexistro de todas as alegacións que se presenten dentro do prazo establecido. Os puntos de recollida habituais están activos en Xinzo, Allariz, Ourense, Bande e, nos próximos días, tamén en Vilar de Santos. Ademais, sumáronse puntos en Sarreaus e Cualedro.
“O obxectivo é mostrar o rexeitamento social a este tipo de explotación industrial tremendamente agresiva contra o territorio”, segundo sinalan desde Stop Eólicos e Movemento Ecoloxista da Limia. A información pódense consultar nas redes sociais e na web xurescelanova.fala.gal.
Nos próximos días, as plataformas informarán doutras accións contra as minas e porán á disposición da veciñanza os documentos presentados pola promotora para iniciar os proxectos que ameazan un amplo territorio nos concellos de Sarreaus, Laza e Cualedro, na Limia; así como de Verín, Vilardevós e Oímbra, na comarca veciña de Monterrei.
Precisamente o Concello de Vilardevós acaba de votar tamén nunha sesión de pleno contra as minas a ceo aberto que están en proxecto para esta zona.
