O poema “Tanto camiñei, camiñei tanto”, de Laura Valeria Gutiérrez Caneda, é o gañador do Certame Literario Antón Tovar convocado polo Padroado do Museo da Limia. A xunta directiva do Padroado reitera a reivindicación de que a Real Academia Galega (RAG) adique a Tovar o Día das Letras Galegas do 2025. Hoxe, 4 de xuño de 2024, cúmprense 20 anos do pasamento de Antón Tovar e, con tal motivo, o Padroado do Museo da Limia convocou un certame literario, patrocinado polo Balneario de Cortegada e o Hotel Bienestar Termas de Monção.
O xurado do certame acordou, por unanimidade, premiar o devandito poema e adherirse tamén ao acordo da xunta directiva do Padroado do Museo da Limia para demandar que a RAG lle dedique o vindeiro Día das Letras Galegas.
O premio consiste nun bono para pasar unha fin de semana para unha parella, en pensión completa, no Hotel Bienestar Termas de Monção (Portugal) e na publicación do texto na revista Tempos Novos. A entrega do galardón será o 15 de xuño no Museo da Limia.
