O grupo municipal do BNG en Xinzo de Limia, encabezado por Camilo Vila, está a elaborar un proxecto para o futuro auditorio da vila baseado na análise de infraestruturas semellantes e na escoita activa da veciñanza.
Para garantir que o futuro equipamento sexa funcional e eficiente, o BNG iniciou unha rolda de visitas a diversos auditorios de Galicia. O obxectivo é coñecer de primeira man os seus modelos de xestión, os servizos ofrecidos e os retos aos que se enfrontan estas instalacións.
Ata o de agora, os representantes nacionalistas visitaron as infraestruturas das seguintes localidades, escollidas pola súa afinidade poboacional con Xinzo:
- Celanova
- Verín
- Redondela
- Cangas
- Tomiño
Segundo sinalou Camilo Vila, estas visitas permiten obter unha aprendizaxe «imprescindible para comprender a verdadeira dimensión social, cultural e económica» que debe ter este espazo. Este traballo de campo compleméntase con encontros directos con colectivos e profesionais do sector artístico de Xinzo de Limia, que achegarán as súas demandas antes de redactar calquera anteproxecto.
Por outra banda, o BNG amosou a súa desconformidade coa estratexia do actual Grupo de Goberno local. A formación lamenta que se rexeitase a súa proposta de crear un proceso participativo formal con partidos políticos e veciñanza. Ademais, critican que o Concello optase por encargar traballos ao alumnado de centros educativos en lugar de convocar un concurso público de ideas para profesionais do sector.
A formación nacionalista confirmou que continuará coas súas visitas técnicas e reunións sectoriais durante as próximas semanas, mantendo o seu compromiso de presentar unha proposta «rigorosa, participada e adaptada ás necesidades reais» do municipio limiao.
