O Concello de Xinzo de Limia acolle o vindeiro día 11, ás 20.00 horas, na Casa da Cultura, o concerto didáctico «Faustino Santalices. O legado». O espectáculo percorrerá a traxectoria creativa de Faustino Santalices (Bande, 1877 – Madrid, 1960), figura fundamental da cultura galega coñecida pola súa investigación, construción e interpretación de instrumentos, recuperando o prestixio da zanfona e da gaita.
A actuación, dirixida e interpretada por Verónica Santalices e Federico Welicki, ofrecerá un percorrido sonoro pola obra do músico. A iniciativa conta coa colaboración da Escola Municipal de Gaitas e Percusión de Xinzo de Limia e de Aimil Folc, a través do seu Coro Aimil.
O obxectivo deste evento é achegar a figura de Faustino Santalices á cidadanía e recoñecer o seu importante legado.
