Ailá abrirá os concertos deste ciclo, nunha actuación que conmemora o 50.º aniversario da asociación cultural Lumieira MARCOS CREO
O Concello presenta unha nova edición deste tradicional ciclo no que haberá tradición, clásica ou polifonía, con peso das entidades locais
31 oct 2026 . Actualizado a las 15:29 h.
Música, tradición, teatro, cinema documental e artes plásticas. Todo iso terá cabida no programa Novembro con música que vén de presentar o Concello de Carballo para este mes a piques de comezar e no que, como vén sendo habitual, terán protagonismo as entidades locais. Música coral, tradición e música clásica serán algunhas das disciplinas dun ciclo que tamén dará continuidade ao Día das Letras Galegas 2025 e a aquelas xornadas Vivan as do meu lugar. Todas as actividades serán de balde e, salvo especificarse o contrario, levaranse a cabo no Pazo da Cultura.
Venres 6 de novembro | 21.00 horas | Concerto de Ailá. A asociación Lumieira é unha das primeiras entidades en ter peso neste novo programa do Novembro con Música. A entidade cultural segue a festexar o seu 50.º aniversario, e desta volta faro cun concerto de Ailá, unha cita na que tamén haberá especial lembranza para Xosé Manuel Eirís, no 30.º aniversario da súa morte. Ailá é tradicional galega e sonoridade actual. Organiza este encontro a propia Lumieira, co patrocinio da Fundación Luís Calvo Sanz e a colaboración do Concello.
Sábado 7 de novembro | 20.00 horas | 41.º aniversario do coro Aires de Bergantiños. A formación polifónica carballesa ten novo director, Xairo Campos, e desta volta festexará anos acompañada da Rondalla de Cedeira e do Coro Aimil de Xinzo de Limia. Colaboran Deputación e Concello.
Venres 13 de novembro | 21.00 horas | Cantares Atlánticos. Recital de cámara e vídeo arte, da man da soprano Soledad Vidal e o pianista Aurelio Viribay. Promove a concellería de Igualdade, ao fío do 25N, Día contra a Violencia de Xénero. Homenaxe, á loita, resiliencia e dignidade das mulleres galegas fronte ás distintas formas de violencia e opresión. O repertorio parte de poesía galega, dende cantigas medievais a composicións contemporáneas.
Sábado 14 de novembro | Varias horas | II Xornadas «Vivan as do meu lugar». A idea é promover e difundir o patrimonio tradicional, musical e oral de Carballo e Bergantiños, fomentando o intercambio entre as asociacións do municipio. O título da xornada, Vestir a memoria, alude a un encontro arredor do vestiaririo tradicional galego, historia, usos e importancia como patrimonio: de 11.00 a 13.00 e de 16.30 a 20.00. En paralelo, Montse Rivera ofrecerá Cóntoche un traxe, espectáculo para público familiar (13.00 horas) e para as 20.00 programouse un desfile de vestiario tradicional antigo.
Sábado 28 de novembro | 20.00 horas | 53.º Concerto de Santa Cecilia. Promove a Coral de Bergantiños, co apoio de Concello e centro social San Xoán Bautista. Ademais da formación anfitriona, actuará a coral Alecrín de Brión (Ferrol) e a Casa do Mar de A Coruña.
MÁIS ALÁ DA MÚSICANo programa Novembro con música teñen cabida ademais outras artes: 7 de novembro | 17.00 horas | Magosto en Lema e narración oral con Avelino González: Contos que foron chistes. No local social de Lema, baixo a organización da asociación Ría de Lema. Xoves 12 de novembro | 20.00 horas | Documental sobre Mary Quintero, pioneira da fotografía: Máis de 90 anos de creatividade. Martes 17 de novembro | 10.30 horas | Redrum Teatro. Función escolar coa peza Sophie non é o meu nome de guerra.Do 18 de novembro ao 8 de decembro. Concellería de Cultura e Deputación promoven a exposición do XIX Certame de Arte Isaac Díaz Pardo. Xoves 19 de novembro | 20.00 horas | Documental sobre a insubmisión galega: Crónicas dun non! Xoves 26 de novembro | 20.00 horas | Documental L’Archéologue, sobre a transformación en escultura dos restos do Mar Exeo.
Archivado en:
Carballo municipio
Música
Teatro
Día das Letras Galegas
Arte
