Representantes da organización francesa Secours Populaire visitaron o centro O Viso, en Lodoselo (Sarreaus), para estudar estratexias contra os lumes forestais e o abandono do rural.
Ambas as entidades buscarán vías de colaboración tras analizar o problema dos incendios, que atribúen máis á falta de prevención que á fatalidade. O colectivo limiao denunciou que a maior parte do diñeiro público se gasta en apagar lumes en lugar de traballar na xestión do territorio.
Para evitar os incendios máis graves, O Viso propón varias medidas prácticas:
- Recuperar paisaxes variadas e mesturas de cultivos para frear o lume.
- Crear «ecosistemas esponxa», como humedais e brañas, para manter a humidade e loitar contra a seca.
- Substituír os monocultivos que arden con facilidade por vexetación máis resistente.
- Impulsar a gandaría extensiva e os oficios tradicionais para coidar o monte.
