O Concello de Rairiz de Veiga celebrará un pleno extraordinario o próximo 4 de novembro ás 12:00 horas para debatir unha moción de censura contra a actual rexedora, Asunción Morgade.
A moción foi presentada este mércores 21 de outubro e conta cos votos necesarios para apartar do cargo á alcaldesa socialista:
- Os dous concelleiros do PP.
- Os dous concelleiros do BNG.
- O edil Daniel González Ferreiro, que deixou o PSOE e agora é concelleiro non adscrito.
A alcaldesa, Asunción Morgade, cualificou a manobra de venganza persoal por parte de González Ferreiro, vencellándoa coa regularización dun posto de traballo no Concello que ocupaba o irmán deste último.
Pola súa banda, a dirección comarcal do BNG desmarcouse totalmente desta decisión, afirmando que os seus dous concelleiros actuaron á marxe da organización. O partido esixiulles que retiren a súa sinatura do documento ou, pola contra, abrirá un expediente de expulsión para que entreguen as súas actas.
