A cabeza de lista do BNG por Ourense ás eleccións do vindeiro 29 de novembro, Noa Presas, cifrou en 30,9 millóns de euros o incremento adicional das pensións mínimas e non contributivas na provincia entre 2024 e 2025. A candidata nacionalista reivindicou o impacto económico das melloras impulsadas pola súa formación durante esta lexislatura e pediu o apoio electoral ao BNG para continuar avanzando na protección das persoas pensionistas.
Segundo os cálculos realizados a partir dos datos facilitados polo Ministerio de Inclusión, Seguridad Social y Migraciones, a cantidade corresponde á diferenza entre as revalorizacións aplicadas ás pensións e as que resultarían de actualizar unicamente as prestacións conforme ao IPC.
Presas defendeu a importancia da negociación política para conseguir melloras nas prestacións e asegurou que o BNG traballou para que as pensións mínimas e non contributivas aumentasen por riba da inflación. «Estes datos amosan a importancia de negociar, defender propostas concretas e ter a capacidade suficiente para influír nas decisións que se toman en Madrid», sinalou.
A candidata tamén destacou a relevancia destas medidas para a provincia de Ourense, onde, segundo indicou, existen importantes desigualdades económicas e territoriais. Neste sentido, subliñou que as pensións «son vitais para a economía das familias e para garantir vida digna para as persoas que traballaron toda a súa vida».
Máis de 37.500 persoas beneficiarias en Ourense
A formación nacionalista cifra en máis de 37.500 as persoas beneficiarias destas melloras na provincia. Segundo os datos expostos por Presas, máis de 5.000 persoas que perciben pensións non contributivas beneficiáronse do incremento, mentres que a cifra supera as 30.000 no caso das pensións mínimas.
Para a cabeza de lista, estes datos evidencian a necesidade de contar cun BNG con maior representación na vindeira lexislatura para garantir prestacións suficientes e contribuír a reducir tanto a fenda territorial como a de xénero. A candidata tamén defendeu avanzar cara a un sistema público de pensións «máis xusto» e redistributivo.
«Cando Galiza ten voz propia, pode negociar e conseguir avances. Queremos seguir mellorando as pensións, protexer quen menos cobra e acabar cunha situación en que Ourense ten das prestacións máis baixas do Estado», manifestou Presas, que apelou a reforzar a representación nacionalista a partir do 29 de novembro para defender os intereses da cidadanía ourensá.
