O Auditorio Rio Lima, en Ponte de Lima, acolleu o II Encontro do programa «Escolas de Fronteira», unha iniciativa promovida pola Consellería de Educación para fomentar a unión e o intercambio cultural entre Galicia e Portugal.
Nesta edición, o proxecto centrouse na recuperación das cantigas populares como Patrimonio Inmaterial e Interxeracional común a ámbos lados da fronteira. O traballo baseouse nunha investigación previa realizada polos alumnos coas familias das súas respectivas comunidades educativas.
Os centros educativos que participaron foron:
- CEIP das Vendas da Barreira
- CEIP de Cualedro
- CEIP Rosalía de Castro
- EB de Ponte de Lima
- CEB de Arcozelo
Durante o evento, diversos grupos interpretaron cancións populares, culminando o acto cunha actuación coral de todo o alumnado que interpretou as versións galega e portuguesa da canción «Saia da Carolina».
Como resultado final, o proxecto rematará coa publicación dun cancionero, tanto en formato papel como virtual, que incluirá as producións recollidas e gravacións dos familiares (pais e avós) que participaron na investigación.
