A Xunta de Goberno da Deputación de Ourense vén de aprobar a licitación do servizo de recollida e tratamento de restos de obras na planta de Morgade, en Xinzo de Limia, ademais de novas subvencións para concellos e eventos deportivos.
O contrato para a xestión da planta de residuos de construción terá unha duración de 17 anos e un orzamento máximo de 6,1 millóns de euros. Esta instalación encargarase de recibir e tratar os refugallos das obras en toda a provincia. As empresas que queiran optar á concesión deberán facerse cargo das reparacións necesarias nas instalacións. Para os usuarios, o obxectivo é fixar tarifas o máis económicas posible, sen que a Deputación cobre un canon polo servizo.
A administración provincial tamén deu luz verde a diversas axudas económicas:
- Concellos: 130.000 euros en total. 100.000 serán para mellorar camiños en Punxín e 30.000 para equipar a residencia de maiores de A Teixeira.
- Deporte: 79.120 euros repartidos en 49 axudas para organizar eventos deportivos en 2026, entre eles campionatos de Enduro, Judo, Hockey e Halterofilia.
Por outra banda, a Deputación ampliou ata o 31 de outubro de 2027 o prazo para xustificar as axudas destinadas á rehabilitación de vivendas para alugueiro social. Esta medida busca dar máis marxe aos concellos de menos de 20.000 habitantes para executar as obras e presentar a documentación necesaria.
Finalmente, a institución provincial aprobou novos trámites para o arranxo da estrada OU-304, entre A Armada e Astariz (Castrelo de Miño), e fixo axustes nas obras previstas en Baños de Molgas.
