A aldea de Lodoselo, en Sarreaus, converterase a próxima semana no escenario dun encontro internacional onde 30 mozos de entre 18 e 30 anos compartirán ideas para mellorar o futuro das zonas rurais.
O evento está organizado pola asociación BreGal dentro do proxecto Rural Nova, financiado por Erasmus+. O obxectivo é que participantes de España, Portugal, Francia, Alemaña, Italia e Hungría coñezan proxectos reais e propoñan cambios para desenvolver a contorna na que viven.
As actividades terán lugar nas instalacións do CDR O Viso e inclúen:
- Debates e traballo en grupo sobre oportunidades no rural.
- Un taller de elaboración tradicional de pan.
- Unha visita guiada á queixería O Rexo.
- Encontros con persoas e iniciativas de Galicia e Portugal que xa traballan no desenvolvemento rural.
