A Xunta de Goberno da Deputación de Ourense aprobou hoxe un paquete de axudas que suma 1.204.755,62 euros, destinados a reforzar a cooperación cos concellos e a apoiar o tecido social, cultural, deportivo e económico da provincia.
O investimento máis destacado corresponde á resolución da convocatoria de subvencións para entidades sociais sen ánimo de lucro, á que se destinan 461.558,24 euros. Esta cifra supón un incremento orzamentario superior ao 70 % respecto a convocatorias anteriores, consolidándose como a maior aposta da institución polo terceiro sector.
Estes fondos beneficiarán a 58 entidades que desenvolven proxectos de atención a persoas maiores, con discapacidade, infancia, enfermidades crónicas, saúde mental e inclusión laboral, entre outros ámbitos. Segundo o presidente provincial, Luis Menor, trátase dunha mostra do «compromiso coas entidades que realizan un traballo esencial de proximidade».
As entidades beneficiarias desta convocatoria son, entre outras: ARELA, Fundación Amigos de la Barrera, CDR Portas Abertas, Algaria, FEAFES Galicia, Cáritas Diocesana de Ourense, Down Ourense, AGADHEMO, ASEM Galicia, Fundación Secretariado Gitano, CIMO, ASOTRAME, ALCER Ourense, Asociación Española Contra o Cancro, IGAXES e a Asociación Autismo ApúntasTE.
Outras axudas ao tecido asociativo
Ademais da convocatoria principal, a Deputación aprobou novas colaboracións para fomentar a actividade local:
- Social: 150.000 euros en total para entidades como COGAMI, Cruz Vermella (para funcionamento e programas de infancia) e Cáritas Ourense.
- Cultural: Apoios á Agrupación de Libreiros de Ourense, Unión Musical de Allariz, Asociación Cultural Xan de Arzúa, Conservatorio Profesional de Música de Ourense e a Festa do Chuletón de Garabás.
- Deportivo: Axudas para o Club Hóckey Barrocás, Club Deportivo Arnoia e Escola Balonmán Ribeiro.
- Económico: Fondos para ASAGA, o Consello Regulador de Valdeorras e a Confederación Empresarial de Ourense (CEO) para impulsar a transformación dixital e a inserción laboral.
Cooperación municipal e mancomunidades
A Xunta de Goberno tamén aprobou 150.000 euros repartidos entre a Mancomunidade Conso-Frieiras, a Mancomunidade da Comarca de Ourense e a Mancomunidade do Carballiño (50.000 euros para cada unha). Así mesmo, destináronse fondos específicos para concellos:
- Conservatorios de música: 50.000 euros para O Barco de Valdeorras, O Carballiño e Xinzo de Limia.
- Infraestruturas e cultura: 70.000 euros para o Concello do Irixo (nave municipal), 28.000 euros para Xunqueira de Espadanedo (Museo da Alfarería), 18.000 euros para Taboadela (Semana Cultural), entre outras partidas.
Luis Menor recalcou que estes acordos son fundamentais para «reforzar os servizos públicos, a cohesión territorial e o apoio a quen máis o precisa», garantindo así o benestar e o desenvolvemento de toda a provincia de Ourense.
