O pasado 12 de xuño, a Casa da Cultura de Sandiás foi a sede do II Obradoiro “Límites con Corazón”, unha actividade destinada ás familias para reflexionar sobre a educación infantil e a importancia de establecer normas de maneira consciente.
A sesión contou coa participación da experta Reme Cid, quen desenvolveu a sesión cun enfoque centrado en desmitificar a idea de que poñer límites implica dureza ou distanciamento. O obxectivo principal foi demostrar que os límites, aplicados con afecto, respecto e coherencia, son unha expresión de coidado que axuda a crear contornas seguras e promove o desenvolvemento emocional e a autonomía das nenas e nenos.
A través de dinámicas participativas, o obradoiro proporcionou ferramentas para:
- Acompañar a crianza: Promovendo un vínculo afectivo baseado na empatía.
- Educación positiva: Transmitir normas con claridade e coherencia, evitando o uso de castigos.
- Xestión de retos: Axudar ás familias a comprender o proceso de desenvolvemento infantil e a identificar recursos para afrontar os desafíos educativos diarios.
A iniciativa, de carácter gratuíto, contou cunha boa acollida, reafirmando a necesidade de ofrecer espazos de formación e acompañamento que favorezcan unha educación máis consciente e respectuosa para as familias da zona.
