O delegado territorial da Xunta en Ourense, Manuel Pardo, visitou a Agrupación de Voluntarios de Protección Civil (AVPC) de Sarreaus para constatar a chegada das axudas destinadas ao funcionamento destas entidades en concellos de menos de 50.000 habitantes, mancomunidades e agrupacións de concellos da provincia.
A Consellería de Presidencia, Xustiza e Deportes destinou 135.000 euros na provincia de Ourense dentro desta convocatoria, que a nivel autonómico suma 370.000 euros. Estas axudas directas están destinadas a cubrir gastos esenciales como:
- Equipamento, vestimenta e equipos de prevención e protección.
- Mantemento de bases e custos de actuacións.
- Seguros do persoal voluntario e formación.
- Equipamento informático e de comunicacións.
Ademais deste apoio ao funcionamento, a Xunta reforza anualmente o material mediante convocatorias específicas. Desde o ano 2015, a inversión global en material e recursos de emerxencias supera os 28 millóns de euros. Paralelamente, a formación do persoal voluntario a través da Academia Galega de Seguridade Pública (AGASP) contou cunha inversión superior aos 3 millóns de euros nos últimos anos.
Un total de 69 entidades resultaron beneficiarias desta convocatoria, entre elas as AVPC de municipios como Allariz, Sandiás, Sarreaus, Verín, Xinzo de Limia, Laza, Celanova e Ribadavia, así como diversas agrupacións e mancomunidades da provincia de Ourense.
