Accidente na N-525 en Sandiás: volca un camión e escapan decenas de porcos
O martes, pasadas as 7:30 horas, produciuse un accidente de tráfico na N-525, concretamente á altura do restaurante Novaíño, no concello de Sandiás. Un camión de transporte de animais volcou mentres o condutor intentaba realizar unha maniobra de cambio de sentido para regresar a unha granxa da zona, o que provocou que decenas de porcos quedasen soltos na calzada.
O condutor do vehículo resultou con feridas leves. Foi atendido no lugar polos servizos de emerxencia e trasladado posteriormente a un centro sanitario para unha revisión.
No operativo interviñeron efectivos dos Bombeiros, a Garda Civil de Tráfico e o servizo de Conservación de Estradas, quen traballaron na recollida dos animais e no control da seguridade viaria na zona afectada.
