A Axencia Estatal de Meteoroloxía (AEMET) activou a alerta laranxa por fortes precipitacións na provincia de Ourense. Espéranse acumulacións de choiva que poderían superar os 80 milímetros en 12 horas nas comarcas do Noroeste, Miño e Sur de Ourense dende a mañá do luns 26.
Nestas mesmas zonas, as precipitacións poderían ser aínda máis intensas, con valores puntuais de ata 150 mm en 12 horas na Baixa Limia, o que aumenta o risco de incidencias.
Ademais, mantense a alerta amarela por choivas en diversas zonas dende a mañá do luns. Prevénse precipitacións de ata 15 mm por hora na Coruña (Interior), Ourense (Noroeste, Miño e Sur) e Pontevedra (Interior). Tamén se esperan acumulacións de ata 50 mm en 12 horas en toda a provincia da Coruña, Lugo (Centro, Montaña e Sur), Ourense (Montaña) e Pontevedra (Rías Baixas e Miño).
A Dirección Xeral de Emerxencias e Interior recomenda adoptar medidas preventivas e, en caso de necesidade, mobilizar os recursos dispoñibles. En situación de emerxencia, a cidadanía debe contactar co 112.
