O deseñador limiao Isaac Gómez crea o cartel do Entroido de Xinzo 2026 cunha aposta pola innovación

Xinzo de Limia – O deseñador gráfico limiao Isaac Gómez foi o encargado de crear a imaxe do Entroido de Xinzo para o ano 2026. Na súa proposta, Gómez busca representar a esencia da celebración, combinando a tradición coa innovación. Fuxindo da estética habitual, o cartel presenta unha composición que integra as distintas partes do traxe tradicional, dende a pantalla ata elementos que lembran outras festividades do ciclo do Entroido como o fareleiro ou a piñata, buscando así romper co habitual e ofrecer unha nova perspectiva da festa.

A obra e a súa visión do Entroido

Isaac Gómez describe a súa obra como unha composición onde a figura principal é a «pantalla», pero vista dende un punto de vista diferente ao das imaxes convencionais. «Quería romper un pouco cos deseños, facelo algo distinto», afirma o deseñador, quen quixo incluír elementos que lembrasen que o entroido é un ciclo completo, non só a figura da pantalla.

Para Gómez, o entroido é «un sentimento» que se vive intensamente en Xinzo, presente durante os 365 días do ano. Esta idea de «barullo» e «multitude», propia do entroido limiao, tratou de plasmarla no cartel a través dun bodegón cun «pequeno desorde» que reflicte a vibración da festa.

Un orgullo para o deseñador

Ser o autor do cartel do entroido da súa terra natal supón para Isaac Gómez «un orgullo e unha satisfacción» inmensa. A boa acollida que está tendo o deseño entre o público engade un valor engadido á súa satisfacción. Agradece a oportunidade de poder contribuír á festa e que a xente recoñeza e valore o seu traballo.

Elementos esenciais do Entroido de Xinzo

Ademais da icónica máscara, Gómez salienta outros elementos fundamentais do entroido de Xinzo, como o cinto e o son das campás, os zocos, o colorido das capas e os panos floreados. Tamén fai referencia á pequena «ola» que aparece no deseño, representando os domingos do ciclo do entroido, como o fin de semana do oleiro, que se celebra nun ambiente máis tradicional e que el considera parte da «esencia» que non se debe perder.

O deseñador subliña a importancia de non esquecer o pasado e o traballo que se foi facendo ao longo dos anos, xa que é iso o que lle outorga ao entroido de Xinzo a repercusión que ten hoxe en día.