Alumnado do IES Cidade de Antioquía estuda a transformación da Lagoa de Antela

Vinte estudantes do Ciclo Superior de Forestal e Medio Natural do IES Cidade de Antioquía (Xinzo de Limia), acompañados pola súa profesora Alba, realizaron o pasado mércores 15 de abril unha visita formativa ao Centro de Interpretación da Lagoa de Antela, situado en Sandiás.

Desenvolvemento da visita

A xornada, coordinada por Pepe Gándara, comezou cunha introdución cultural e histórica que incluiu a lectura da lenda da Cidade de Antioquía asolagada e a referncia ao «Marco das Antas», peza etnográfica situada nos xardíns do instituto.

A través dun audiovisual e cartografía histórica, o alumnado analizou os seguintes puntos clave:

• Transformación da paisaxe: Estudo dos procesos xeolóxicos de formación da conca da Limia, os proxectos de desecación da lagoa durante o franquismo e o proceso de concentración parcelaria impulsado polo Iryda e a Xunta de Galicia.
• Xeografía e Medio Ambiente: Análise da toponimia da zona, a diferenza entre humidais naturais e artificiais, e o impacto dos solos areosos na aceleración da contaminación hidráulica.
• Biodiversidade e Restauración: Revisión de proxectos de recuperación ambiental como a Veiga de Gomareite e o Humidal Antonio Vilariño.

Proxectos de impacto ambiental

Durante a visita destacáronse diversas iniciativas de conservación e investigación:

• In-visible pollut: Un proxecto multidisciplinar (que conta coa USC e diversas ONG) para detectar contaminantes e pesticidas nas plumas das cegoñas.
• Life Rexenera Limia: Proxecto finalizado en 2019 centrado na rehabilitación de areeiras.
• Senda das Cegoñas: Iniciativa posta en marcha por Amigas das Cegoñas nas Areeiras.

A actividade rematou con un balance positivo pola participación activa do alumnado, quedando pendente para futuras ocasións a visita in situ ás Areeiras da Limia e o estudo do patrimonio etnográfico da zona.

Fonte: www.sandias.es