Etiqueta: xinzo

O delegado territorial da Xunta en Ourense, Manuel Pardo, visitou esta mañá o CEIP Carlos Casares de Xinzo de Limia para supervisar o programa piloto de vacinación infantil fronte á gripe con vacina intranasal. Esta iniciativa pioneira abrangue nenos e nenas de 6 meses a 11 anos, o que supón preto de 215.000 menores en Galicia.

Pardo estivo acompañado por Santiago Camba e Josefa Rodríguez, responsables da Área Sanitaria de Ourense, Verín e O Barco. Explicou que as consellerías de Sanidade e Educación puxeron en marcha este proxecto en dez centros da provincia, entre eles o de Xinzo, co obxectivo de vacinar máis de 2.700 escolares de 3 a 11 anos.

A vacinación é voluntaria para o alumnado de Infantil e Primaria, e a Xunta busca acadar unha cobertura do 70 % entre os nados entre 2014 e 2022. En función dos resultados, estudarase a ampliación do programa ao resto dos centros.

Na provincia de Ourense prevese administrar arredor de 102.000 doses, das cales 10.845 serán para nenos e nenas. O obxectivo final é reducir as complicacións derivadas da gripe e frear a cadea de transmisión, protexendo tanto aos pequenos como ás súas familias e á comunidade.