O municipio de Xinzo de Limia acollerá unha nova edición dos encontros formativos Ruralmente, que buscan pór en valor os produtos agroalimentarios e dinamizar a comarca da Limia. As actividades terán lugar os días 25, 26 e 27 de marzo na Casa da Brea, en Piñeira Seca.
O proxecto, cun orzamento de 207.241,56 euros, está financiado polo Plan Estratéxico da PAC 2023-2027 do Ministerio de Agricultura, Pesca e Alimentación, co cofinanciamento da Unión Europea. Está organizado polo GDR Limia-Arnoia, o GDR Galicia Suroeste Eurural e a Asociación para o Desenvolvemento Integral do Val de Ambroz, coa colaboración da IXP Pataca de Galicia e o Concello de Xinzo de Limia.
Programación detallada:
- Mércores 25 de marzo: A xornada comeza coa Escola de Sarreaus, centrada na alimentación de proximidade. Incluirá unha ponencia sobre a transformación da pataca e unha visita técnica a Patatas Guays. Pola tarde, inaugurarase unha exposición fotográfica e haberá un percorrido guiado por Piñeira Seca.
- Xoves 26 de marzo: Dedicada aos produtores de calidade, con conferencias sobre a importancia das IXP e comunicación dixital. Realizarase un acto institucional cos grupos de desenvolvemento rural, unha homenaxe a Pepe da Droguería e actuacións da Agrupación Musical de Xinzo de Limia, o grupo ELO e Xoucukin.
- Venres 27 de marzo: Sesión aberta ao público xeral, con charlas sobre arquitectura tradicional galega, paisaxe local e un estudo económico da Universidade de Santiago de Compostela sobre a influencia da pataca na zona. Concluirá coa entrega dos Premios Semente, unha nova intervención de Xoucukin e un concerto a cargo do Cuarteto Caramuxo.
Os organizadores pretenden fomentar a innovación no medio rural e consolidar as marcas de calidade como motores do desenvolvemento económico.
Fonte: www.diariodolimia.gal
