A Cofradía dos Viños de Monterrei nomea tres novos membros

A Cofradía dos Viños de Monterrei celebrará o venres 8 de agosto un acto na Igrexa Parroquial de Verín para nomear tres novos membros, abrindo así a Feira do Viño de Monterrei.

Os homenaxeados son Xosé Manuel Santiago Afonso, técnico de Unións Agrarias en Verín, José Manuel Gómez Gómez «Cazolas», enxeñeiro agrícola xubilado, e Manuel Pardo Cid, delegado territorial da Xunta de Galicia en Ourense.

A elección recoñece a contribución dos tres ao sector vitivinícola da comarca de Monterrei dende distintos ámbitos: asesoramento técnico, atención a viticultores e bodegueiros, e vínculo co ámbito público.

A Cofradía dos Viños de Monterrei, fundada en 2013, busca preservar e divulgar a tradición e calidade dos viños da rexión. Coas novas incorporacións, sumará 57 membros.

A cerimonia, aberta ao público, servirá como punto de encontro para os amantes do viño e a cultura local.