O subdelegado do Goberno en Ourense, Eladio Santos, supervisou o dispositivo de seguridade para o Entroido de Xinzo de Limia, que comezará o 24 de xaneiro co Petardazo e rematará o 22 de febreiro. O dispositivo está integrado pola Garda Civil, Policía Local, Bombeiros, Protección Civil e Cruz Vermella.
Santos presidiu a Xunta Local de Seguridade ordinaria, na que tamén participaron o alcalde, Amador Díaz, representantes da Xunta de Galicia e das forzas de seguridade.
Durante a xuntanza, abordouse o control de aforo na Praza Carlos Casares o sábado 24 de xaneiro a partir das 21:00 horas para previr riscos, e prohibirase o acceso con obxectos de vidro.
Ademais, analizouse a criminalidade no municipio, destacando o subdelegado o bo resultado da Garda Civil en 2025, cunha maior porcentaxe de esclarecemento e unha redución das infraccións penais.
En canto á violencia de xénero, Xinzo de Limia ten 27 casos activos dentro do sistema VioGén, e o subdelegado apelou á implicación de todas as administracións para combater esta lacra.
Fonte: www.diariodolimia.gal
