A Asociación de Empresarios, Ganaderos e Agricultores da Limia (ADEGAL) alertou ás administracións da grave situación que atravesa a comarca, cualificada como unha «crise sen precedentes». As continuas choivas e o temporal puxeron en risco a viabilidade de numerosas explotacións, xerando perdas económicas directas que superan os 3.200.000 euros.

Impacto nos cultivos e perdas económicas

A acumulación de auga arruinou por completo os cultivos de inverno, afectando gravemente a economía dunha zona cuxo principal motor é o sector primario, e que destaca por ser a principal produtora de cereal de Galicia, base de produtos con indicacións protexidas como o Pan de Cea ou o Pan Galego.

O impacto na colleita de cereal de ciclo longo será do 90% en comparación cun ano normal. De 8.000 hectáreas habitualmente sementadas, só 2.000 puideron ser plantadas debido ás adversidades climáticas do outono, o que supón 2 millóns de euros en perdas neste cultivo.

A situación agrávase coa colza, onde as inundacións inutilizaron as 700 hectáreas plantadas, sumando outros 1,2 millóns de euros ao prexuízo económico das familias.

Ademais, ADEGAL denuncia que o mal drenaxe de cunetas, ríos e canles agravou o anegamento das fincas e causou danos significativos en infraestruturas agrarias e pistas tras a concentración parcelaria.

Demandas de ADEGAL

Ante este escenario, ADEGAL esixe que a comarca da Limia sexa declarada oficialmente como «Zona afectada por unha emerxencia». Entre as medidas solicitadas inclúense:

• Bonificacións fiscais (IRPF, IBI e Imposto de Sociedades).
• Axustes nas cotizacións á Seguridade Social.
• Actualización dos seguros agrarios para que reflectan a realidade dos rendementos da zona.
• Adiantamento das axudas da PAC.
• Liñas de apoio directo para a compra de insumos (abonos e sementes), similares ás habilitadas noutras crises, para previr o abandono da actividade e facilitar o relevo xeracional.