A partir do vindeiro luns, 16 de marzo, Xinzo de Limia implementará unha reorganización temporal do tráfico debido á nova fase das obras de humanización da travesía da N-525. Esta medida, que se prevé que estea vixente ata finais de maio, busca facilitar as entradas e saídas da vila.
Novas regulacións de tráfico:
- Saída cara a Ourense: A Avenida de Ourense, dende a glorieta do Eroski ata a glorieta da autovía (N-525), habilitarase unicamente en sentido saída.
- Entrada a Xinzo: Os vehículos procedentes da N-525 deberán utilizar a Pista Zepetal para acceder á glorieta da Avenida de Celanova / Travesía Moreira. Dende alí, a incorporación ao centro da vila realizarase pola Avenida de Celanova, que quedará habilitada exclusivamente en sentido entrada ata a rotonda do Eroski.
Accesos na zona do Zepetal:
É importante distinguir entre dúas vías con nomes similares na zona:
- A Rúa Zepetal (tramo urbano dende a Rotonda do Pasión ata o Gadis) será de uso exclusivo para residentes.
- A Pista Zepetal (vía exterior que conecta a glorieta da Av. Celanova coa N-525) manterá o dobre sentido de circulación para canalizar o tráfico.
Estas obras, impulsadas polo Ministerio de Transportes, teñen como obxectivo transformar a principal arteria da vila nun espazo máis sostible, seguro e accesible para peóns e ciclistas. O Concello de Xinzo de Limia pide desculpas polas molestias que poidan xurdir e insta aos condutores a extremar a precaución e seguir a sinalización provisional e as indicacións da Policía Local.
Fonte: www.dendealimia.com
