Estudantes Mexicanos Coñecen a Organización Social e Institucional de Xinzo de Limia

O Concello de Xinzo de Limia recibiu a visita dun grupo de estudantes universitarios do Centro Universitario Tlacaélel de Ixtapaluca (Cidade de México). A delegación, que se atopa aloxada na vila, está a coñecer de primeira man a organización social e institucional española.

O alcalde, Amador Díaz, deu a benvida oficial aos estudantes e explicoulles o funcionamento da administración local, destacando o peso da agricultura e a realidade socioeconómica da comarca da Limia.

O concelleiro de Educación e Cultura, Carlos Gómez, guiou aos universitarios nun percorrido pola historia de Xinzo, pondo en valor o seu patrimonio histórico, etnográfico e cultural como elemento vertebrador da sociedade e motor de dinamización local.

Os estudantes, que cursan disciplinas como Pedagoxía, Dereito, Xornalismo ou Psicoloxía, amosaron grande interese polo funcionamento da institución municipal e o papel da educación e a cultura.

Como parte da súa inmersión, recibiron unha conferencia sobre «Comunicación en institucións públicas de 10.000 habitantes» impartida por Marcos Argibay, responsable de comunicación do Concello. Argibay detallou o seu traballo, desde a estratexia e redacción de notas de prensa ata a xestión de redes sociais e a cobertura de eventos.

Esta experiencia forma parte dunha diplomatura sobre innovación que os estudantes cursan en España, dirixida polo limiao Eladio Jardón Ferreiro.

O Concello de Xinzo de Limia salienta a relevancia destas visitas internacionais para proxectar a imaxe da vila como un referente cultural e un destino de interese para a formación e o coñecemento da realidade sociocultural.

Fonte: www.dendealimia.com