As educadoras da escola infantil Galiña Azul de Xinzo de Limia adherironse o pasado 7 de maio á folga convocada polo movemento “Pola dignidade do 0-3”. Esta mobilización busca denunciar a precariedade do sector e reclamar que a educación infantil sexa recoñecida como unha etapa fundamental do sistema educativo e non simplemente como un servizo de conciliación.
As profesionais reivindican que a infancia merece maior respecto e atención institucional, destacando que «coidar é educar», xa que os primeiros anos de vida son determinantes no desenvolvemento emocional, cognitivo e social das crianzas.
Entre as principais demandas do colectivo destacan:
- Redución de ratios abusivas e implantación da parella educativa.
- Melloras nas condicións salariais, maior estabilidade laboral e recursos humanos.
- Aumento dos recursos materiais, mellora das infraestruturas e apoio real á educación inclusiva.
- Máis tempo destinado á coordinación e á atención non directa.
Finalmente, o colectivo denuncia a forte feminización e precarización deste sector, sostendo que dignificar o traballo das educadoras infantís é un paso imprescindible para lograr a igualdade e garantir o compromiso coa educación pública.
