Xinzo de Limia acollerá a etapa raíña da quinta edición de O Gran Camiño.
A capital da Limia será o punto de partida da etapa considerada como a máis dura da competición ciclista internacional. A presentación oficial do percorrido tivo lugar en Padrón, no Auditorio do Campus Tecnolóxico Cortizo.
Unha delegación do Concello de Xinzo, liderada polo alcalde Amador Díaz, xunto cos concelleiros Carlos Gómez (Cultura e Turismo) e Cristina Campero (Deportes), asistiu ao evento para subliñar a importancia desta proba para a proxección da comarca.
A etapa ourensá, programada para o 17 de abril, constará de 155,5 quilómetros, cun desnivel positivo de 3.103 metros. Tras saír de Xinzo, o percorrido pasará por Allariz, Celanova, Ourense e Maceda.
O final da etapa promete ser decisivo, coa ascensión ao Alto do Rodicio e un dobre paso polo Alto de Meda, de primeira categoría, que marcará as diferenzas na clasificación xeral, finalizando en Xunqueira de Espadanedo.
Fonte: www.diariodolimia.gal
