Leticia Sabater actuará no Entroido de Xinzo de Limia
07 feb 2025. Actualizado ás 14:21 h.
Leticia Sabater actuará, en principio, no Entroido de Xinzo de Limia. A súa actuación é o prato forte da Festa Glam, que se estrea este ano na programación. Será o venres 28 de febreiro.
A artista anunciara unilateralmente, a través dunha mensaxe a un programa de televisión, a cancelación do espectáculo debido ás críticas da oposición. Con todo, o Concello nunca o comunicou oficialmente e, despois de falar con ela, o concelleiro de festas, Ricardo Sieiro, afirma que a actuación seguirá adiante.
A polémica coa actuación de Leticia Sabater partiu dos concelleiros do BNG en Xinzo tras coñecer a programación do Entroido deste ano. Criticaron que a Festa Glam ou Brilii Brilli é «un invento populista que busca encher as prazas a calquera prezo sen coidar a esencia da festa nin a hostalaría de toda a vila». Ademais, consideraron que o espectáculo de Sabater non é adecuado para o venres de Entroido, por ser a data máis infantil do calendario. «Unha proxección hipersexualizada e unha mensaxe antieducativa non poden presidir a nosa festa tradicional», asegurou o concelleiro Camilo Vila.
Ante estas declaracións, Leticia Sabater enviou unha mensaxe a un programa de televisión da TVG para anunciar que cancelaba o concerto. Aclaraba que era unha decisión persoal na que non participara a organización, á que agradecía que pensaran nela. Alegaba que tiña unha xira de máis de 200 concertos onde a xente si desexaba a súa presenza.
Con todo, o Concello non se pronunciara oficialmente ao respecto. O concelleiro Ricardo Sieiro, responsable do Entroido, explica que falou con ela para continuar co espectáculo e finalmente así será. O 28 de febreiro a partir das 23:00 horas na Praza de San Roque comezará a Festa Glam con Leticia Sabater.
Respecto ás críticas do BNG, o edil defende que cada un pode expresar a súa opinión e é respectable. «Como llo fixemos ver a ela, hai unha parte que non está de acordo e como todo provoca diferentes reaccións, é respectable», declarou.
Archivado en: Leticia Sabater, Entroido Xinzo de Limia
Fonte: www.lavozdegalicia.es
