O Concello de Xinzo de Limia celebrou a segunda edición dos Premios Semente da Pataca e Cereal de Galicia, galardóns que recoñecen o traballo do sector agrícola, fundamental para a economía local e comarcal.

Este ano, o evento trasladouse á parroquia de Piñeira Seca, concretamente á Casa da Brea, un espazo rehabilitado, onde se entregaron 11 premios en diferentes categorías.

Un recoñecemento á esencia do rural galego

A gala, conducida por Eva González, coordinadora do GDR Limia-Arnoia, destacou a importancia de «poñer en valor o produto feito no rural e todo o que hai detrás do sector gandeiro e alimentario».

A conselleira do Medio Rural, María José Gómez, subliñou que «sen o sector Primario non se entendería Galicia, é a súa esencia», eloxiando a calidade da IXP Pataca de Galicia.

O alcalde de Xinzo, Amador Díaz, amosou o seu «orgullo de ser alcalde e pataqueiro», afirmando que os premios Semente son un merecido recoñecemento «á canteira e ao bo traballo que se fai día a día» no sector da pataca e o cereal.

Galardoados e recoñecementos

• Traxectoria Empresarial: Gallega de Patatas. A súa directora xeral, Gloria Fernández, agradeceu aos agricultores produtores.
• Muller Rural: Melani Araujo (Calvos de Randín), quen reivindicou o papel da muller no campo.
• Compromiso Ambiental: Centro de Desenvolvemento Agrogandeiro do Inorde. O seu presidente, Rosendo Fernández, agradeceu o recoñecemento ao traballo realizado durante 30 anos.
• Investigación Agraria: Campus Auga da UVigo en Ourense. O seu vicerreitor, Javier Rodríguez, destacou o labor desenvolvido na Limia.
• Xove Emerxente: Abel Sotelo, xestor de máis de 25 hectáreas de patacas, que reafirmou o seu compromiso de seguir traballando con ilusión.
• Excelencia Innovadora: Harinas Hermanos Reyes.
• Produto Local do Ano: Festa da Pataca de Vilar de Barrio.
• Proxecto Gastronómico: Campionato de España de Tortilla de Patacas.
• Repercusión Local: GDR10 Limia-Arnoia.
• Divulgación de Valores Rurais: Campo Galego.
• Premio Especial Semente: Vegalsa-Eroski.

As Xornadas Ruralmente conclúen coa entrega de premios

Os Premios Semente puxeron o broche final ás xornadas «Ruralmente», organizadas polos GDR Limia-Arnoia, Galicia Suroeste e Valle del Ambroz. Estas xornadas, dedicadas á pataca de Galicia, incluíron charlas, actividades formativas, encontros e visitas ao territorio.

Como parte das xornadas, presentouse o estudo económico «Análise do sector da pataca e a súa importancia na comarca da Limia». O estudo sinala que a Limia ten o 73% da súa superficie traballada e que o sector da pataca representa case o 23% do seu PIB, traducíndose en 65,6 millóns de euros.