As protestas do sector primario continúan en Xinzo de Limia

A vila de Xinzo de Limia foi escenario hoxe de novas protestas do sector primario. Dezias de tractores iniciaron un percorrido polas rúas da localidade na xornada de hoxe, pasadas as 16:00 horas.

Os vehículos, que levaban unha semana estacionados no Parque do Toural, dirixíronse cara ao polígono industrial limiao. Alí, un dispositivo da Garda Civil mantivo o control das rotondas de acceso á autovía A-52 e á estrada N-525, vías de conexión con Ourense.

Durante o traxecto, os tractores contaron coa escolta de numerosos coches da Garda Civil, cuxa presenza é notable na capital limiá dende hai varios días, incluíndo medios aéreos.

No seu regreso, os tractores percorreron a Avenida de Ourense ata o centro da vila. Pasaron pola Praza Maior e tomaron a rúa 2 de Maio para volver ao seu punto de partida no Parque do Toural. Os agricultores e gandeiros manifestáronse cun ritmo lento e facendo soar as súas bucinas.

A maioría dos vehículos regresaron ao Parque do Toural, mentres que algúns continuaron cara aos seus domicilios por necesidade de empregar os tractores para as súas actividades.

Á súa chegada ao punto de partida, esperáballes un importante contingente de axentes da Garda Civil, preto de 20 efectivos e varios vehículos, que controlaron as saídas e acompañaron o percorrido. As protestas continúan á espera de acadar un acordo coas administracións públicas.

Fonte: www.laregion.es