O organismo regulador da IXP Pataca de Galicia, cuxa principal zona de produción se atopa na comarca limiá, lanzou unha ambiciosa campaña de promoción a nivel nacional para este ano 2026. O obxectivo principal desta nova estratexia é achegarse directamente ao consumidor final e potenciar o recoñecemento visual do selo de calidade nos supermercados de todo o país. Búscase que o cliente identifique claramente o produto certificado no momento da compra, asociando o distintivo a unha garantía de orixe, excelencia e trazabilidade.
Para fomentar esta fidelización, lanzouse un sorteo que estará activo ata finais de abril, e os gañadores elixiránse en maio. Sorteanse tres experiencias para dúas persoas na Ribeira Sacra, cun valor de 800 euros cada unha. Estas experiencias combinarán gastronomía, aloxamento e natureza nunha zona emblemática da comunidade. Para participar, os usuarios deben adquirir unha bolsa certificada, acceder á web oficial patatadegalicia.es, encher un formulario, introducir o código da etiqueta e subir unha foto do envase coa certificación oficial.
Ademais dos premios, esta acción permitirá recompilar datos estatísticos sobre o perfil do comprador e o recoñecemento da marca, información clave para optimizar futuras estratexias. Paralelamente, estreouse unha nova páxina web dirixida ao consumidor final, onde se detallan as vantaxes de consumir esta pataca, destacando os rigorosos controis de calidade, as súas propiedades nutricionais, e a súa textura e sabor. Deste xeito, ponse en valor o traballo do sector produtor e demóstrase que elixir esta marca é unha decisión de confianza e compromiso co produto local.
Fonte: www.diariodolimia.gal
