O concello de San Cibrao das Viñas será beneficiario dunha axuda de preto de 120.000 euros da Xunta de Galicia para mellorar a eficiencia enerxética da escola infantil municipal. O anuncio foi realizado polo delegado territorial da Xunta en Ourense, Manuel Pardo, á alcaldesa do municipio, Marta Novoa.
Esta subvención, procedente dunha convocatoria da Consellería de Presidencia, Xustiza e Deportes cun orzamento de 5 millóns de euros cofinanciado con fondos Feder para o período 2025-2026, destinarase a optimizar o consumo enerxético do edificio e a crear unhas condicións máis saudables e respectuosas co medio ambiente para os nenos e nenas.
As actuacións previstas inclúen a substitución das carpinterías e vidros por outros de alta eficiencia enerxética, a instalación dun sistema de aerotermia en substitución da actual caldeira de gas natural, e a implantación de tecnoloxía LED de baixo consumo na iluminación.
A liña de axudas está dirixida a concellos de menos de 30.000 habitantes e cobre ata o 80% dos gastos en illamento, iluminación interior e climatización, cun límite de 120.000 euros por proxecto. Na provincia de Ourense, outros 16 concellos tamén resultaron beneficiarios, sumando máis de 1,5 millóns de euros en total.
O obxectivo destas achegas é reducir as emisións de gases de efecto invernadoiro, mitigar os efectos do cambio climático, facilitar o aforro enerxético e económico aos concellos, e mellorar o confort dos usuarios dos servizos municipais, ademais de impulsar a reactivación económica dos sectores implicados.
O delegado territorial tamén destacou o compromiso do Goberno galego co ámbito local, mencionando outras liñas de colaboración e apoio aos concellos, como a orde de infraestruturas, o Fondo de Compensación Ambiental, o impulso a proxectos estratéxicos, un novo proxecto piloto para compartir maquinaria municipal e o incremento do Fondo de Cooperación Local.
Fonte: www.dendealimia.com
