A localidade de Xinzo de Limia sufriu durante a xornada de onte un importante caos circulatorio, agravado pola chuvia e, principalmente, por un corte total na N-525 que afectou ao paso de tráfico pesado polo centro da vila.

O epicentro do problema rexistrouse arredor das 19:00 horas, cando queimas de rodas e alpacas de palla na N-525, á altura de Patacas Paz, provocaron a interrupción do tráfico. A afectación estendeuse tanto á estrada nacional como á autovía A-52, en dirección a Madrid.

Durante a tarde, a densidade de tráfico de camións, especialmente frigoríficos dirixíndose a prazas de abastos de grandes cidades, incrementouse considerablemente. Estes vehículos tiveron que ser desviados pola estrada que conduce a Cualedro para volver incorporarse á autovía.

Ás 21:00 horas, tras a intervención de tres dotacións de bombeiros para sufocar as chamas e a posterior limpeza da vía con maquinaria pesada, reabríuse o tráfico na estrada nacional. Non obstante, a autovía A-52 mantivo o seu corte.