O CDR O Viso desenvolveu durante o ano 2025 o proxecto «Itinerarios integrados contra o despoboamento rural e a inclusión social», beneficiando a 73 persoas na Comarca da Limia. A intervención abarcou 18 núcleos de poboación en 7 concellos clasificados como DEGURBA 3 (zonas rurais escasamente poboadas) e 1 concello DEGURBA 2.
A metodoloxía do proxecto centrouse no acompañamento individualizado, a participación activa e a creación de redes de apoio comunitario para mellorar a calidade de vida e a inclusión social e laboral no medio rural.
As persoas participantes distribuíronse en tres áreas de intervención:
- Garantía Xuvenil: 21 menores de 18 anos participaron no programa Concilia “Volta ao cole”, que facilitou a conciliación familiar e ofreceu un espazo educativo e lúdico centrado en valores como a igualdade e o respecto.
- Inclusión Social: 12 persoas recibiron apoio personalizado para mellorar as súas habilidades de integración comunitaria, autocoidado e saúde.
- Inclusión Laboral: 40 persoas foron acompañadas na súa busca de emprego. O 37,5% acadou un posto de traballo, mentres que o 40% participou en formacións para adquirir competencias en sectores como servizos, comercio e o ámbito sociosanitario.
O proxecto destaca a importancia da conciliación familiar como elemento clave para a participación efectiva nos procesos de inserción sociolaboral, especialmente para pais e nais, subliñando a necesidade de espazos de coidado no medio rural.
O CDR O Viso reafirma o seu compromiso para o 2026 en seguir impulsando iniciativas que melloren a empregabilidade, fortalezan as redes comunitarias e promovan os coidados e a igualdade, contribuíndo ao desenvolvemento da Comarca da Limia.
Este proxecto realízase no marco do Programa de itinerarios integrais contra o despoboamento rural e a inclusión social, concedido a COCEDER e enmarcado no Programa Estatal de FSE+ de inclusión social, garantía infantil e loita contra a pobreza. As iniciativas son gratuítas e cofinanciadas pola Unión Europea e a Xunta de Galicia a través do Programa Integral de Intervención Comunitaria no medio rural, con cargo á asignación tributaria do 0,7% do IRPF e Imposto de Sociedades.
Fonte: www.dendealimia.com
