Sentenza do Supremo esixe acción contra a contaminación da Limia

O Tribunal Supremo condena á Xunta de Galicia e á Confederación Hidrográfica Miño-Sil (CHMS) a tomar medidas urxentes para atallar a contaminación das augas da Limia, unha situación que, segundo a sentenza, as administracións non abordaron nos últimos 20 anos.

Esta resolución xudicial chega tras unha longa loita de colectivos e veciños da comarca que denuncian a inacción das administracións fronte á degradación ambiental e os riscos para a saúde derivados da presión da agroindustria na zona.

Demandas urxentes

Ante esta situación, volven esixirse unha serie de medidas concretas:

• Moratoria ás macrogranxas.
• Estudo exhaustivo da saúde da poboación das comarcas da Limia.
• Declaración da conca do Limia como Zona Vulnerábel, tal e como esixe a normativa europea.
• Implantación dun catálogo de Boas Prácticas agrogandeiras.
• Cumprimento inmediato da sentenza coa presentación dun plan de actuacións por parte da Xunta e da CHMS.

Acto público e documental en Ourense

Para visibilizar estas demandas e a problemática, o próximo xoves, 9 de abril, levarase a cabo un acto na cidade de Ourense. O evento terá lugar na Casa da Cultura (Concello, 11) e inclúe a proxección do documental «QUEN CONTAMINA A LIMIA?».

Este filme, producido por NOTICIAS DISPERSAS E RADIO LIVERDADE e realizado por Alfonso Cid e Diego Freire, condensa a problemática ambiental da Limia e a loita veciñal que culminou coa sentenza do Tribunal Superior de Xustiza de Galicia (TSXG) que recoñecía a vulneración de dereitos fundamentais.

Tras a proxección, que comezará ás 19:30 horas, haberá un coloquio (ao redor das 20:30 horas) no que participarán os realizadores do documental xunto a Manuel García (Movemento Ecoloxista da Limia) e Pablo Álvarez (Asociación de Veciños das Conchas), representantes clave na defensa do territorio e na loita contra a contaminación.