Concello de Xinzo de Limia encarga estudo á USC sobre o sector da pataca

O Concello de Xinzo de Limia encargou á Universidade de Santiago de Compostela (USC) a realización dun traballo de investigación centrado na “Análise do sector da pataca e a súa importancia na comarca da Limia”. O obxectivo deste estudo, coordinado polo profesor Francisco Jesús Ferreiro Seoane e un equipo multidisciplinar da USC e da Universidade da Coruña (UDC), é “radiografar con datos obxectivos a realidade do noso produto estrela”, avaliando o seu impacto no emprego, a xeración de riqueza e a fixación de poboación, así como identificar oportunidades de futuro.

Esta iniciativa, descrita polo Concello como “pioneira”, enmárcase na súa estratexia para potenciar e protexer o sector rural.

As conclusións oficiais da investigación presentaranse publicamente o vindeiro venres 27 de marzo durante a gala dos Premios Semente. Este certame, promovido polo goberno local, busca recoñecer iniciativas emprendedoras ligadas ao sector agrícola e destacar a calidade da pataca e o cereal da comarca. Mentres tanto, o Concello irase facendo eco dos datos “máis impactantes” do estudo nos próximos días.