O Partido Popular de Ourense creou a primeira agrupación de Novas Xeracións na comarca da Limia, co obxectivo de «exemplificar o compromiso da mocidade co partido e a sociedade».
Esta iniciativa tivo lugar na sede do partido en Xinzo de Limia, nunha reunión á que asistiron máis de cincuenta mozos e mozas, xunto a alcaldes e representantes municipais da comarca. Tamén estiveron presentes a vicepresidenta do PP de Ourense, Marta Novoa, e a secretaria xeral, Sandra Quintas.
Luis Menor, presidente provincial, deu a benvida a Alberto Cuquejo Cid, quen liderará a agrupación local de Novas Xeracións da Limia cun equipo inicial de quince persoas. Cuquejo Cid agradeceu a confianza depositada e declarou que a posta en marcha desta xestora «vai dar forzas para formular novas alternativas e conseguir un gran cambio».
Menor expresou o seu entusiasmo pola «magnífica resposta» da mocidade da Limia e manifestou o seu desexo de que esta xuntanza sexa o «primeiro paso para a progresiva incorporación de moitos mozos que nos achegarán unha visión diferente e complementaria do sentir da sociedade».
Fonte: www.laregion.es
