A Asociación de Veciños de As Conchas quere destacar a gran repercusión da coñecida como Sentenza Limia, tanto en España como no ámbito internacional. Este fallo xudicial consolídase como un dos máis relevantes en materia de dereitos fundamentais e contaminación ambiental ligada á gandería intensiva.
A relevancia da sentenza confirmouse coa celebración dunha xornada especializada en Madrid, organizada pola Fundación Fide e ELSA España. Neste encontro, analizáronse os fundamentos xurídicos e científicos da sentenza, así como as súas implicacións para a gobernanza ambiental e a responsabilidade das administracións públicas.
A Asociación considera especialmente significativo o interese mostrado por The European Law Students’ Association (ELSA), a maior organización independente de estudantes de Dereito a nivel mundial. A inclusión da Sentenza Limia nos seus debates académicos internacionais subliña o carácter pioneiro deste fallo, tanto en España como en Europa, dentro do litixio climático e ambiental.
A xornada abordou aspectos cruciais como a confirmación xudicial da inacción das autoridades públicas fronte á contaminación por nitratos e o valor probatorio das análises isotópicas e químicas que acreditaron a orixe gandeira da devandita contaminación. Todo isto, tras a sentenza firme que recoñece a vulneración de dereitos fundamentais dos veciños de As Conchas.
Para a Asociación, este feito supón un profundo significado: o recoñecemento xudicial do sufrimento vivido polos veciños, que hoxe se estuda como un caso emblemático no ámbito xurídico europeo.
Este logro colectivo exténdese ás comarcas de A Limia e Baixa Limia, marcando un antes e un despois na defensa do dereito á auga limpa, a un medio ambiente san e a unha vida digna no rural galego.
Tras a xornada, a Asociación de Veciños de As Conchas solicitará formalmente á Fundación Fide e a ELSA España as conclusións do encontro. Con esta información, remitirán unha nova nota de prensa aos medios para trasladar á cidadanía e ás comarcas afectadas o alcance legal dos debates e as aprendizaxes derivadas deste caso pioneiro a nivel europeo.
A Asociación de Veciños de As Conchas reafirma o seu compromiso de seguir traballando para que esta sentenza se traduza en solucións reais e para evitar futuras situacións de abandono institucional.
Fonte: www.dendealimia.com
