A pasada xoves 18 de decembro, a charca onde a empresa Feldespatos Sarreaus realizou as súas explotacións cambiou a cor da súa auga, que se volveu dun intenso vermello. Tras o aviso dun veciño, varios organismos desprazáronse ata o corpo de auga para recoller mostras e realizar análises.
A Confederación Hidrográfica Miño-Sil (CHMS) comunicou que, tras as súas análises preliminares, o cambio de cor «podería deberse a unha proliferación da especie de cianobacteria Planktothrix rubescens«. A CHMS aclara que o crecemento natural desta especie ocorre en augas quietas e profundas durante os meses de inverno e principios de primavera, citando como precedente a detección desta mesma especie no encoro de Vilasouto (O Incio).
A CHMS engade que, a diferenza doutras cianobacterias, Planktothrix prolifera en masas de auga con baixa concentración de nutrientes, mencionando como exemplos lagos nos Alpes Suízos e franceses, ou o encoro do Atazar na serra madrileña.
Se estes resultados iniciais se confirman, «descartaría calquera influencia do material afundido na charca», segundo explican.
Á espera dos resultados definitivos, que tamén inclúen os da Consellería de Medio Ambiente da Xunta de Galicia, os veciños manifestaron a esperanza de que, se o problema non se debe ao barco afundido, «aínda estamos a tempo de facer algo e retíralo».
A proliferación de Planktothrix tampouco é esperanzadora a nivel medioambiental, xa que esta especie atópase no «Catálogo de cianobacterias planctónicas potencialmente tóxicas das augas continentais españolas», ao posuír a capacidade de xerar un impacto tóxico na fauna e na potabilidade da auga.
Fonte: www.laregion.es
