Xinzo de Limia comeza a construción dun novo aparcadoiro gratuíto no barrio do Polígono

O Concello de Xinzo de Limia iniciou as obras para un novo aparcadoiro gratuíto no barrio do Polígono, con 98 prazas para vehículos e 6 para motos. A actuación enmárcase no plan de mobilidade urbana “Xinzo Paso a Paso”.

O aparcadoiro está situado entre as rúas Río Sil, Río Arnoia e Río Arenteiro, cunha superficie de 2.700 metros cadrados, e dará servizo á zona comercial, edificios administrativos e outros servizos da vila.

O orzamento da obra é de 48.000 euros, financiados con fondos municipais, e espérase que estea rematada nun par de semanas. Segundo o concelleiro Ramón Gómez, o plan «Xinzo Paso a Paso» busca facer «máis apetitosa a vila para transitala e achegarse a ela».