Comunicado da Asociación

Ante a publicidade dunha empresa de transporte, coñecida pola súa actividade ao longo dos anos, que consideramos que non só non aporta nada positivo ao noso Entroido e ao respecto que lle temos, senón que tampouco xera beneficios para os negocios da vila, especialmente a hostalaría, senón todo o contrario, expresamos a nosa profunda sorpresa e indignación.

É de dominio público o tipo de «clientela» que atraen estas supostas excursións programadas que ofrecen viaxe con bebida incluída. Este ano, para empeorar a situación, a súa publicidade inclúe o eslogan: «PUEDES TRAER TU PROPIA BEBIDA», fomentando o que tanto os entroideiros como o sector da hostalaría intentamos evitar: que a nosa festa se converta nun «botellódromo» no centro da vila.

Esta proposta, que *a priori* pode parecer interesante, só incrementa a posibilidade de altercados nos nosos establecementos debido ao comportamento dos visitantes, coas consecuentes repercusións negativas para nós e para a nosa clientela.

Permitir o transporte de bebidas a bordo favorece e facilita os excesos e o vandalismo posterior, tanto nas rúas e edificios como nos nosos establecementos.

Sabemos que é difícil evitar ou prohibir que unha empresa realice a súa actividade, pero confiamos en que as administracións, especialmente o Concello e os seus representantes, poidan tomar medidas para protexer os negocios da vila que contribuímos á prosperidade económica municipal coas nosas taxas e licenzas ao longo do ano.

E sen esquecer os custos derivados do lixo e os destrozos provocados por estas ofertas «atractivas», que finalmente repercuten en todos os veciños de Xinzo.

Polos motivos expostos, solicitamos:

• Que a Concellaría de Festas comunique á empresa anunciante que non fomente nin facilite o botellón nas viaxes ao Entroido de Xinzo e que se abstenha de publicitar «PUEDES TRAER TU PROPIA BEBIDA».
• Que a Concellaría de Seguridade Cidadá comunique ás forzas e corpos de seguridade do Estado (Policía Nacional e Garda Civil) a necesidade dun control e vixilancia exhaustiva deste tipo de transporte desde Ourense ata Xinzo, para evitar que os usuarios cheguen con bebidas alcohólicas ou en estado de embriaguez.
• Que a Policía Local e o dispositivo de seguridade do Entroido 2025 eviten o estacionamento destes autobuses no centro da vila (Estación de autobuses) e habiliten un estacionamento disuasorio na explanada dos IES.

Fonte: www.dendealimia.com