A Residencia Santa Mariña de Xinzo de Limia está a vivir a chegada da primavera con actividades que enchem os seus espazos de cor, risas e creatividade. Os residentes participan en obradoiros manuais que buscan non só entreter, senón tamén fomentar a memoria e o benestar xeral.
Rosa María, residente dende hai máis dun ano, destaca a importancia destas actividades para romper a rutina diaria. «Estamos adornando unhas caixas… facemos figuras, aquí faise de todo», explica, amosando o seu entusiasmo pola estación: «A min a primavera e o verán é o que máis me gusta. Sobre todo as flores e o bo tempo».
A súa compañeira Esperanza tamén comparte este sentimento, recordando a súa infancia ligada ás flores. As manualidades permítenlle revivir eses recordos e manter a conexión coa natureza. Pola súa banda, Camila atopa na pintura unha forma de pasar o tempo e expresarse, reflectindo a súa paixón polas flores nas súas obras.
Marta Fernández Sotelo, educadora social da residencia, é a encargada de planificar estas iniciativas. O seu obxectivo é dobre: fomentar a creatividade e axudar os residentes a situarse no calendario. «Decoramos a residencia con flores colgadas do teito, pintamos un palé con motivos primaverais e fixemos caixas como se fosen de coellos, porque agora é a Pascua. Estas actividades axudan a situarse no tempo, a recoñecer a estación, e o bo tempo tamén mellora o estado de ánimo», detalla.
O bo tempo da primavera tamén permite gozar máis do aire libre. Recentemente, os residentes realizaron unha excursión de tres días ao balneario de Arnoia, unha mostra das múltiples posibilidades que ofrece esta estación fronte ao inverno. Saídas ao xardín, ao parque ou pequenas excursións son oportunidades para a socialización e a actividade física.
Estas actividades xeran nos residentes un forte sentido de participación e autonomía. Cada elemento decorado ou figura creada convértese nun símbolo da estación. O programa de manualidades da Santa Mariña ten un compoñente terapéutico que, aínda que require unha explicación inicial para algúns, remata animando a todos grazas á temática e as cores, axudando a gozar do presente.
