O Cartel do Entroido de Xinzo de Limia

Miguel Carballo, limiao de toda a vida e entroideiro apaixonado, é o autor do cartel deste ano. Aínda que o seu estudio, Karbayo Estudio Creativo, se atopa en Asturias, non esquece as súas raíces nin a súa xente, a cal serviu de inspiración para esta obra.

O eslogan deste ano é «O sentimento dun pobo», un lema que se reflicte perfectamente no cartel. A idea foi integrar diferentes escenas emblemáticas do Entroido, que xuntas forman a silueta dunha pantalla, elemento icónico da festa e que fai partícipe ao pobo no propio cartaz.

O cartel contén elementos facilmente recoñecibles que, esperamos, transmitan sensacións moi positivas aos veciños de Xinzo. A súa beleza reside na capacidade de ofrecer unha lectura diferente segundo a distancia á que se observe: unha visión xeral e outra máis detallada, ambas capaces de capturar a esencia da festa, onde a cor xoga un papel fundamental.

O proceso de creación comezou na semana previa ao Nadal. Miguel e o seu equipo revisaron todos os cartaces desde o ano 2001 para evitar repeticións. Finalmente, optaron pola ilustración dixital, un proceso que, unha vez definida a idea principal, levou dúas semanas de traballo.

Para Miguel, como limiao, que supuxo ser o encargado de crear o cartel dunha data tan importante como o Entroido?

«Como limiao e entroideiro, éncheme de orgullo facelo para o pobo de Xinzo. Dedicámoslle moito tempo a este proxecto, traballando man a man co concelleiro Ricardo Sieiro case a diario. Iamos xustos de tempo, pero estou moi satisfeito co resultado. Agora, o traballo pertence ao pobo.»

A obra reflicte a certeza de que cada persoa de Xinzo, coa súa colaboración e entusiasmo, mantén viva a chama do Entroido xeración tras xeración. A pantalla, como eixe central do cartel, cobra vida grazas ás escenas, xestos e tradicións que a conforman. Baixo o lema «O sentimento dun pobo», o deseño destaca a forza colectiva que anima o Entroido, revelándose non como unha festa calquera, senón como un latido ancestral que se fortalece coa participación de cada persoa nos seus rituais e costumes. Pasado e presente únense nesta composición, iluminando o legado festivo e mirando cara ao futuro.

Fonte: www.dendealimia.com